မြတ်ဗုဒ္ဓဟောကြားတော်မူခဲ့သော
သိင်္ဂါလောဝါဒသုတ်တော်လာ
ဆက်ဆံရေးဝတ်တရာများကို
သင်္ဂဇာဆရာတော်ဘုရားကြီးက
မြန်မာအမျိုးကောင်းသား/
သမီးတို့လွယ်ကူစွာမှတ်သားနာယူ၊
လိုက်နာကြစေရန်အလို့ငှာလင်္ကာအသွင်သီကုံးရေးသားခဲ့ပါသည်။
(၁) မိဘနှင့်သားသမီးဆက်ဆံရေး
-မိဘဝတ်တရား(၅)ပါး။ ။
မကောင်းမြစ်တာ၊ကောင်းရာညွှန်လတ်၊အတတ်သင်စေ၊
ပေးဝေနှီးရင်း၊ထိမ်းမြားခြင်းလျှင် ၀တ်ငါးအင်ဖခင်မယ်တို့တာ။ ။
-သားသမီးဝတ်တရား(၅)ပါး။ ။
ကျွေးမွေးမပျက်၊ဆောင်ရွက်စီမံ၊မွေခံထိုက်စေ၊
လှူမျှဝေ၍၊စောင့်လေမျိုးနွယ်ဝတ်ငါးသွယ်ကျင့်ဖွယ်သားတို့တာ။ ။
-------------------------------------------------------------------
(၂) ဆရာနှင့်တပည့်ဆက်ဆံရေး
-ဆရာ့ဝတ်တရား(၅)ပါး။ ။
အတတ်လည်းသင်၊ပဲ့ပြင်ဆုံးမ၊သိပ္ပမချန်၊
ဘေးရန်ဆီးကာ၊သင့်ရာအပ်ပို့၊ဆရာတို့ကျင့်ဖို့ဝတ်ငါးဖြာ။ ။
-တပည့်ဝတ်တရား(၅)ပါး။ ။
ညီညာထကြွ၊ဆုံးမနာယူ၊လာမူကြိုဆီး၊
ထံနီးလုပ်ကျွေး၊သင်တွေးအံရွတ်၊
တပည့်ဝတ်၊မချွတ်ငါးခုသာ။ ။
--------------------------------------------------------------
(၃) လင်နှင့်မယားဆက်ဆံရေး
-လင့်ဝတ်တရား(၅)ပါး
မထီမဲ့ကင်း၊အပ်နှင်းဥစ္စာ၊မိစ္ဆာမမှား၊
၀တ်စားဆင်ယင်၊မြတ်နိုးကြင်၊
ငါးအင်လင့်ကျင့်ရာ။ ။
-မယားဝတ်တရား(၅)ပါး
အိမ်တွင်းမှုလုပ်၊သိမ်းထုတ်သေချာ၊
မိစ္ဆာကျဉ်ရှောင်၊
လျော်အောင်ဖြန့်ချီ၊ပျင်းရိမမူ၊
၀တ်ငါးဆူ၊အိမ်သူကျင့်အပ်စွာ။ ။
-----------------------------------------------------
(၄) မိတ်ဆွေအချင်းချင်းပေါင်းသင်းဆက်ဆံရေး
ပေးကမ်းချီးမြှင့်၊ကိုယ်နှင့်ယှဉ်ထား၊စီးပွားဆောင်ရွက်၊
နှုတ်မြွက်ချိုသာ၊သစ္စာမှန်စေ၊၀တ်ငါးထွေ၊
ကျင့်လေမိတ်သဟာ။ ။
-----------------------------------------------------
(၅) အလုပ်ရှင်နှင့်အလုပ်သမားဆက်ဆံရေး
-အရှင့်ဝတ်တရား(၅)ပါး
၀စွာကျွေးမွေး၊ပြုရေးစီရင်၊နာလျှင်ကုစေ၊
ငှဝေရသာ၊အခါကိုလွှတ်၊
အရှင့်ဝတ်၊ဟောရွတ်ပဥ္စဓါ။ ။
-ကျွန့်ဝတ်တရား(၅)ပါး
အိပ်သော်နောက်ကျ၊ထသော်ကားရှေး၊
ပေးမှယူအပ်၊
စေ့စပ်ဆောင်ရွက်၊ကျေးဇူးမြွက်၊
ငါးချက်ကျွန်ကျင့်ရာ။ ။
----------------------------------------------------
(၆) ဒကာနှင့်ဆရာဆက်ဆံရေး
-ရဟန်းဝတ်တရား(၅)ပါး။ ။
မကောင်းမြစ်တာ၊ကောင်းရာကိုလှစ်၊
အသစ်ဟောကျူး၊နာဖူးထပ်မံ၊
နတ်ထံတင်ရာ၊မေတ္တာလည်းပြု၊
ရဟန်းမှု၊ခြောက်ခုလွန်သေချာ။ ။
-ဒါယကာဝတ်တရား(၅)ပါး။ ။
မေတ္တာစိတ်သက်၊ဆောင်ရွက်ချစ်ခင်၊ခင်မင်နှုတ်ချို၊
လိုလျှင်ဖိတ်ထား၊တတ်အားလှူစေ၊ငါးခုနေ၊
ပြုလေဒါယကာ။ ။
---------------------------------------------------------
